Tydeleg, men ikkje rigid 

•

•

Eg skriv denne Ettertanke medan Misjon Sarepta har rådsmøte på Bjorliheimen Fjellhotell. Dette er eit fint høve for folk som er aktive i Sarepta til å møtast, verta kjente, få innføring i arbeidet og koma med innspel til det som etter kvart har vorte eit omfattande og allsidig misjonsarbeid. Rådsmøtet er eit uformelt møte som ikkje gjer vedtak. Det er også fint å få bruka Bjorliheimen til eit slikt arrangement, slik at folk vert godt kjente med plassen. Det gjer det lettare å driva PR for det arbeidet som skjer her. Det er forresten ei god utvikling i arbeidet ved Bjorliheimen. 

Eit rådsmøte skal vera til åndeleg oppbygging, til profilering av organisasjonen og til drøfting av arbeidet. Alt dette har sin plass i programmet, og det heile går nokså slag i slag. Sidan eg no er ute av styret for Misjon Sarepta, er eg «menig» deltakar på rådsmøtet, og det er ei fin oppleving. Eg hadde like fullt fått i oppdrag å ha eit føredrag eller seminar med tittel «Luthersk-roseniansk, med litt slingring på dekk». Det var jo ei spesiell og litt humoristisk emneformulering, men saka er nokså aktuell – både generelt i Kristen-Noreg og for Misjon Sarepta. 

Poenget var å få fram noko av det Bibelen seier om å vera tydeleg, det å stå for noko ut frå ei overtyding skapt av Guds ord, utan å verta rigid og snever. Sarepta står plassert i det norske bedehuslandskapet, og der råder ei luthersk vedkjenning for arbeidet, og ofte av roseniansk valør – utan eg eg her har spalteplass til å gå nære inn på det. 

Eg prøvde å løfta fram nokre døme frå Guds ord som viser at det på ein del område er plass for og må vera eit visst slingsrom. Utan det vil det verta menneskeleg og åndeleg tvang, og det vil føra inn i åndeleg isolasjon og enda opp som sekt. Dette må likevel ikkje overskygga dei mange formaningane i Bibelen til å vera tydelege og kjempa for den trua som ein gong for alle er overgjeven til dei heilage ved apostlane. 

Når det er snakk om «slingring på dekk», er vi i bilete av ein båt. Skal båten ha berekraft og vera styringsdyktig, må han ha ein skikkeleg kjøl. Har båten det, vil det vera rom for noko slingring på dekk utan at det går ut over kurs og oppdrag. Har båten ikkje skikkeleg kjøl, vil alt som er på dekk vera utsett for fare, ved at båten både kan kantra og grunnstøyta. I temaet var «luthersk-roseniansk» uttrykk for kjølsettinga. 

Det vil seia at vi må vera tydeleg i det som skaper ei luthersk-roseniansk kristendomsoppfatning. Då er menneskesynet, frelsesforståinga og nådemiddeloppfatninga avgjerande viktig. Det er snakk om å ha forkynninga av forsoninga, rettferdiggjeringa ved tru og atterfødinga til nytt liv som tyngdepunkt, orienteringspunkt og kraftpunkt. Det vil gje ei åndeleg kjølsetting som gjer at det meste av alt anna fell greit på plass, og som samstundes gjer rom for slingsmonn der det trengst og er forsvarleg. 

Johannes Kleppa 

Vil du lese mer?

• Mer

• Mer av